Mar 12 | TGG | STEP | Namih, Iesu ka tipes fas ri sabin ini foron orek fatoftof aragii, “Nenge kaltu i so nenge porpor wain ma ka ubiif kale u. Aiwa na palgan porpor wain, ka tuung nenge fat una bing turim danun wain, ke ka tel nenge fabiro fel ae i kangkang tom ken tom parpar kaleh. Ke ka ta u bii e porpor wain ae usuf fal e tom foim isi rik parpar kale lo, ma ka la una nenge maleh tapak.

Mark 12

Orek Fatoftof lon foron Tom Foim na Porpor Wain

(Mt 21:33�46; Lk 20:9�19)

1 Namih, Iesu ka tipes fas ri sabin ini foron orek fatoftof aragii, “Nenge kaltu i so nenge porpor wain ma ka ubiif kale u. Aiwa na palgan porpor wain, ka tuung nenge fat una bing turim danun wain, ke ka tel nenge fabiro fel ae i kangkang tom ken tom parpar kaleh. Ke ka ta u bii e porpor wain ae usuf fal e tom foim isi rik parpar kale lo, ma ka la una nenge maleh tapak. 2 Na taul lulus, ka wuun ufu nenge fafauun usuf foron tom foim ae, isi ti fal e fuan wain tina porpor wain kia. 3 Isau le foron tom foim ae ri ka luse u ma ri ka pakti, ke ri ka wuun fafis foes u sau. 4 Ke kaltu ae porpor wain kia, ka wuun ufu nenge fafauun sabin usuf ri, ri ka paket u na paklu ke ri ka famatlawen u. 5 Ka wuun ufu nenge fafauun sabin, ke ri ka siimete u. Ka wuun ufu ifuun sabin, isau le ri ka paket fal ke ri ka siimete fal.

6 “Ka tikii mang aiwa tura, e kalalik tutus kia, ae i ier kanaka isi. Pesu ka wuun ufu mang usuf ri, wara le i wol le rin bulat lo. 7 Isau le foron tom foim ri ka put orek turim aragii, ‘Apiek mang e ier ae in ti kiliis tama. Gam la ma kerek siimete u, isi kirer mang e porpor wain igii.’ 8 Ke ri ka luse u, ma ri ka siimete u, ke ri ka lin fasuuh u tina porpor wain ae.

9 “Sanih sabin kaltu ae porpor wain kia ik tel u? In la ma ik siimete foron tom foim ae ma ik ta porpor wain ae usuf fal e fanu keskes. 10 Arafah, biil gam wes sun orek ae na Buk na Gogoh? I use u le,

‘Tuh ae foron tom tel fel ri pue ta u,
ka tapiek rakrakai na tuh.
11 Tier igii Kumguui tom i tel ta u,
ma i rokap kanaka na parpar kirer.’ ^{▼▼12.11Par Buk Song (Psalms) 118:22-23} ”
12 Ke foron famfamu ken fan Iudaia ri ka im sal isi rin luse Iesu, wara le ri usum le i use orek fatoftof igii ulo ri. Isau le ri soke tara gur na fanu, pesu ri ka la koseng u.

Fagalte isi Fiil Takiis usuf Sisar

(Mt 22:15�22; Lk 20:20�26)

13 Namih ri ka wuun ufu fal e Farasi ke fal e tala Erot usuf Iesu isi tata kuun pes u, isi rik tiu u ini ti fal e orek kia. 14 Aunbiing ri la usuf i, ri ka tarah, “Tom fafausum, kemen usum le wo tom tortores, biil o wol pes sanih fanu ri use u ulo wo. Foron fafausum kiam i fasih sau usuf fanu tikii ma o fausum tekentu ri la tom ini sinangu God. Arafah, i tortores le keren fiil takiis usuf Sisar le biil? 15 Arafah, keren ta u le biil?”

Ka iliim ta lem kiri, pesu ka diik ri aragii, “Isi sanih gam ka ier isi tata kuun pes iau? Ti dinari ^{▼▼12.15Pitkalang ken fan Rom ri foteng u ini dinari} uga iak par u.” 16 Ke ri ka ta neng dinari usuf i. Ma ka diik ri aragii, “Tantanwa seh ke asa kiseh igii lo?”

Ke ri ka kiliis u aragii, “Ke Sisar. ^{▼▼12.16Sisar i e asan laulaumet na matanfuntih na Rom, turan foron falifuh tikii ae ri kiis na piklin nagogon tina Rom.}”

17 Iesu ka fas ri aragii, “Sanih ke Sisar, gamen ta u usuf Sisar, ma sanih ke God, gamen ta u usuf God.” Aunbiing ri ongen u, ri ka lala bitit.

Fagalte isi Fakekel na aunbiing na Apaptih fis

(Mt 22:23�33; Lk 20:27�40)

18 Ke foron Sadusi ae ri use u la le biil ti apaptih fis, ri ka la usuf Iesu ma ri ka diik u aragii, 19 “Tom fafausum, Moses i siit ta u usuf kerer aragii, male nenge kaltu i met koseng antu, ma biil ti kalalik kiruh, ke tualik in telpes u ma ruk fakekel, isi in fatapiek tifal e berberat ke tualik ae ka met tah. 20 Nenge ifit latualik, neng famu i fakekel ke ka met koseng antu, ma biil ti kalalik kiruh. 21 Ke fawu u e tualik sabin ka telpes fifin ae, ke ka met sabin koseng fifin ae ma biil ti kalalik kiruh. Ma fatuul u sabin arae. 22 Ifit e latualik tikii ae ri telpes fifin ae, isau le biil i fang ti kalalik kiri ke ri ka met. Namih, fifin mang ae ka met. 23 Na biingen apaptih fis, fifin ae in antu seh tutus mang lo ri? Wara le ri tikii ri telpes ta u.”

24 Iesu ka kiliis ri aragii, “Gam ka la ger tah, wara le biil gam usum na orek ae na Buk na Gogoh ke rakrakai ke God sabin. 25 Aunbiing foron minet rin aptih fis, biil rin fakekel sabin, rin arae foron angelo buuii na kukulii. 26 Gam use u le biil ti apaptih fis. Arafah, biil biitom gam wes ususe na au ae i sok, ae na buk ke Moses? God i fas Moses aragii, ‘Iau e God ke Abaram, God ke Aisak, ke God ke Jekop.’ 27 God biil i God ken foron minet, biil. I e God ken fanu ae ri liu. Gam la ger kanaka.”

Iun Nagogon ae i Laumet Kanaka

(Mt 22:34�40; Lk 10:25�28)

28 Neng lon foron tom fafausum ini nagogon ka la ma ka ongen Iesu i famam fapit turan foron Sadusi. I ongen Iesu i kiliis fakasi ri, ke ka diik u aragii, “Nagogon sah i laumet kanaka lon foron nagogon tikii?”

29 Iesu ka kiliis u aragii, “Igii e nagogon ae i laumet kanaka, ‘Gam fan Israel, gamen ongen u, Kumguui, God kirer, i keskes sau i e God. 30 Gamen ier isi Kumguui i e God kimi, ini balmi tikii, ini tanwa gam tikii, ini wolwol tikii kimi ke ini rakrakai tikii kimi.’ 31 Ma fawu e nagogon i aragii, ‘On ier isi ier ae na fatat o, arae o ier isi wo tom.’ Biil ti nagogon i laumet lon iwu e nagogon igii.”

32 Tom fafausum ini nagogon ae ka fas Iesu aragii, “Tom fafausum, i tekentu kanaka, i tortores e orek kiam, le God i tikii sau, ma biil sabin tikas awii. 33 Keren ier isi God ini balrer tikii, ke ini wolwol tikii kirer ke ini rakrakai tikii kirer, ke keren ier isi fanu tikii ae na fatat kerer, arae kere ier isi kerer tom. Iun nagogon igii, ru laumet kanaka lon foron fafen tikii usuf God ae ri fasok u la, ke fal e fafen sabin.”

34 Aunbiing Iesu i par u le tom fafausum ae i kiliis fakasi u tom, ka fas u aragii, “Biil o tapak tina matanfuntih ke God.” Ke namih, biil sabin tikas i diik Iesu ini ti fagalte, wara le ri sokeh.

Mesaia i e Kumguui ke Dewit

(Mt 22:41�46; Lk 20:41�44)

35 Iesu i famam fausum ri awii na Felun Sising, ma ka diik ri aragii, “Isi sanih foron tom fafausum ini nagogon ri ka tara le Mesaia i e kalalik ke Dewit? 36 Tanwa Kalkaluu i susuef tah ulo Dewit ma ka tara aragii,

‘Kumguui i tara sing Kumguui kiak:
Kiis na miang,
papang na aunbiing ian luun foron tuui kiam
na piklin kekem.’
37 Dewit tom i foteng ta Mesaia le Kumguui kia. Male arae, ke in tapiek kalalik ke Dewit arafah?”

Tumarang lon foron Tom Fafausum ini Nagogon

(Mt 23:1�36; Lk 20:45�47)

Tara gur na fanu ae ri laes kanaka aunbiing ri ongen orek ke Iesu.

38 Ke aunbiing i fausum ri, ka tara aragii, “Gamen tumarang lon foron tom fafausum ini nagogon. Ri ier la isi rin kilkiliis ini foron dolon kaen, ke ri ier la isi rin faorek pes ri ini bulat na aunbiing ri sol na foron falifuh ae fanu ri la turim la wah. 39 Ma ri ier isi kiis la tom na foron nian kiiskiis famu ae na foron felun lotu, ke nian kiiskiis ken foron laulaumet na foron tel inen. 40 Ri fabilbiling foron makos la na date foron minmara ri, ke ri sising dolo la isi fanu rik par ri. Na aunbiing na nagogon, rin kalsakai tara fangungut.”

Fafen ken nenge Makos

(Lk 21:1�4)

41 Iesu i kiis ta fatat isi salan luun pitkalang na Felun Sising, ke ka par fanu fuun ri famam lin turim pitkalang. Ifuun e fanu ae i fuun e minsik kiri, ri luun piran pitkalang aiwa na salan luun pitkalang. 42 Isau le nenge lauu na makos, ka la ma ka luun iwu sau e fabiro pitkalang.

43 Iesu ka tawi pes berberat na fafausum kia, ke ka fas ri aragii, “Tekentu kanaka, ia fas gam, makos igii, i ta tara pitkalang kanaka lon fanu tikii igii. 44 Ri ta ufu ituul sau ae i kiis tina foron minsik kiri. Isau le lauu na makos igii, i ta foron tier tikii ae in fasih na kiiskiis kia.”